পুৱারী

চুরাচান্দপুর জিলাগী পুৱারী

মণিপুরগী নিংথৌ কে সি এস আই সি বি এস চুড়াচান্দ সিংহগী মমিং লৌরগা ডিষ্ট্রিক্ট অসি মমিং থোনখিবনি। চুড়াচান্দপুর ডিষ্ট্রিক্ট অসি মণিপুরগী খা-নোংচুপলোম থংবা মায়কৈদা ২৪.০ N অমসুং ২৪.৩ N দা লেটিচুদতা অমসুং ৯৩.১৫ E অমসুং ৯৪.৪৫ E লোঙ্গিচুদ তা শন্দোক্লগা লৈ।ডিষ্ট্রিক্ট অসি অৱাংদা তমেংলোং ডিষ্ট্রিক্ট , নোংপোকতা ইমফাল অমসুং চান্দেল ডিষ্ট্রিক্ট, মখাদা ম্যানমার(বর্মা) অমসুং মীজো্রাম, নোংচুপ্তা মিজোরাম অমসুং আসাম স্টেটনা কোইশিল্লী। জিলা অসিগী অল্টিচ্যুড না সমুদ্রদগী চাংচৎতা ৯১৪.০ মিটর ৱাংই। ষ্টেট অসিগী অপুনবা পাক চাউবা অসি সার্ভেয়র জেনেরেল ওফ ইন্ডিয়াগী মতুং ইন্না স্ক্বার কি:মি: ৪৫৭০ পাক চাউই।

চুড়াচান্দপুর ডিষ্ট্রিক্ট অসি ১৯৫৯ দা মণিপুরগী ডিষ্ট্রিক্টশিং অমুক হন্না শেমদোক শেমজিন তৌবদগী মণিপুর সাউথ ডিষ্ট্রিক্ট হায়না খঙনরকখি। অহানবদা মণিপুর অসি ডিষ্ট্রিক্ট অমখক লৈরগা সব-ডিভিজন ১০ থোক্না খায়দোকলম্মী। মণিপুর লৈঙাক্কী ওর্ডর নো. ২০/৩৯/৬৯-দি  ১২ নবেম্বর ১৯৫৯ গী মতুং ইন্না ডিষ্ট্রিক্ট ৫ অমসুং সব-ডিভিজন ২৫ থোক্না খায়দোকখি। নোটিফিকেসন অসিগী মতুং ইন্না চুড়াচান্দপুর সব-ডিভিজন অমসুং জিরিবাম সব-ডিভিজনগী চীংগী খুঙ্গং ১৫ মণিপুর সাউথ ডিষ্ট্রিক্টতা তিশিনখি। অদুদগী ডিষ্ট্রিক্ট অসি সব-ডিভিজন ৫ থোক্না হায়বদি – তিপাইমুখ, থানলোন, চুড়াচান্দপুর অৱাং (হৌজিক্না হেঙলেপ), চুড়াচান্দপুর অমসুং থিংহাৎ (হৌজিক্না শিংহাৎ) হায়না খায়দোকখি। অদুদগী ডিষ্ট্রিক্টশিংসিগী ঙমখৈদা খজিক্তং হোংদোক হোংজিন লৈখি। কুমজা ১৯৭২ দা (হৌজিক্না ইম্ফাল ডিষ্ট্রিক্ট) মণিপুর সেন্ট্রেল ডিষ্ট্রিক্টকী জিরিবাম সব-ডিভিজনগী মনুং চনবা খুঙ্গং ১৪বু ডিষ্ট্রিক্ট অসিগী এডমিনিষ্ট্রেটিভ অমসুং রিভেন্যুগী লৈঙাক মনুংদা তিনশিল্লম্মী। কুমজা ১৯৮১ অমসুং ১৯৯১ দা ডিষ্ট্রিক্ট অসিগী চুড়াচান্দপুর সব-ডিভিজনগী চীংগী খুঙ্গং অনি মাঙলম্মী। হায়রিবা খুঙ্গং অনি অসি হান্ননা বিষ্ণুপুর ডিষ্ট্রিক্টকী মনুং চন্দুনা লৈরবনি অদুনা কুমজা ১৯৮৫ দা লৈঙাক্কী খুদোং চানবা বিষ্ণুপুর ডিষ্ট্রিক্টতা চনশিল্লম্মী। মরক্কী মতমদুদা মণিপুর সাউথ ডিষ্ট্রিক্ট হায়বসি চুড়াচান্দপুর ডিষ্ট্রিক্ট হায়না ওনখি।

(ফংফম: ডিস্ট্রিক্ট সেন্সস হেন্ডবুক চূড়াচাঁদপুর -২০১১)