কুমহৈশিং

চুড়াচান্দপুরদা লৈবা ত্রাইবেলশিংগী ওইবা হৌজিক্না মখোয়বু অমত্তা ওইনা মশক তাকপগী মওংদা পাঙথোকলিবা পনবা য়াবা হরাউ কুম্মৈশিংদি খৃষ্ট মাস, চবাং কুট, জোমি নামি, পাইন এপল ফেষ্টিভেল, চপচর কুট, সিকপুওরুওই, জৌতন্নচিংবনি।

চবাং কুট

চবাং কুট – মণিপুরগী চীংগী ডিষ্ট্রিক্টশিংদা লৈবা কুকি চিন অমসুং মিজো ত্রাইবশিংনা “চবাং কুট” হায়বা নিংথম লৌরোক কুম্মৈ অসি য়াম্না হরাউ তয়াম্বগা লোয়ননা পাঙথোকই। হায়রিবা কুম্মৈ অসি ষ্টেটকী থাক্কী কুট কমিটিনা শীন্দুনা মণিপুরগী কোনুং ইম্ফালদা পাঙথোকই। কুম্মৈ অসিনা ঈশ্বরনা মখোয়দা ফৌ চেঙ মরাং কায়না পীবিবগীদমক্তা জগোই ঈশৈগা লোয়ননা মহাকপু থাগৎপা ফোঙদোকপা উৎপনী। ত্রাইবেলশিংনা উৎলিবা মীয়াম্বু মমীৎ থকহল্লিবা ফোল্ক ডান্সশিং অসিদা মখোয়গী হরাউ-নুংঙাইবগী মমি তাই। মমাঙঙৈগী মতমদা চাং(ফৌ)কুট হায়না খঙনরম্বা চয়োল অমা চূপ্না পাঙথোকলম্বা কুম্মৈ অসি ঙসিদি চবাং কুট হায়না খঙনদুনা নোংমতংদা পাঙথোকলে। হৌজিক ওইরিবা মনিপুর ষ্টেট থাক্কী চবাং কুট কুম্মৈ অসি ইহান হান্না ইং কুমজা ১৯৭৯গী নভেম্বর ১দা কৈথেলমানবি খুলদা পাঙথোকখিবদগী ঙসি চহী ৩০গী মথক্তা পাঙথোক্তুনা লাক্লি।চহী খূদীংগী নভেম্বর থাদা পাঙথোক্লিবা চবাং কুটনা ফজরবা মণিপুর ষ্টট অসিদা লৈরিবা মীপুম খূদীংমকপু ঈংনা চীক্না নুংশি চান্ননা লৈমিন্নহল্লী। ষ্টেট অসিবু ঈংনা চীকনা লৈনবা অমদি অমত্তা ওইবা শক্তম পুরক্নবগীদমক্তা কুকি, চিন অমসুং মিজো ত্রাইবশিংখক্তা নত্তনা ষ্টেট অসিদা লৈরিবা নাগা অমদি মীতৈ ফূরুপশিংসু কুম্মৈ অসিদা পূন্না শরূক য়ামিন্নৈ।মিস কুট চাংদম্নবসি কুম্মৈ অসিগী মরূওইবা মীয়াম্না পাম্নবা থৌরমশিংগী মনুংদা অমনী। তোংঙান তোংঙানবা ফূরুপশিংদগী লাকপা শরূক য়ারিবশিংনা মাগী মাগী ফূরুপকী ওইবা ফিজোল শেৎ চাদুনা শরূক য়াই।মণিপুরদা পূন্না ত্রাইব ২৯ লৈ অমসুং মখোয়না মশা মশাগী নাৎকী ওইবা হরাউ কুম্মৈ ময়াম অমা পাঙথোকই। অসিগুম্বা হরাউ কুম্মৈশিং পাঙথোকপা অসিনা লমদম অসিগী থোইদোক হেন্দোকপা ফজবা মশক তাকপদা নত্তনা লমদম অসিদা লৈরিবা তোংঙান তোংঙানবা ত্রাইবশিংগী মরক্তা অচেৎপা মরী থম্বদা য়াম্না মরু ওইবা থৌদাং অমা লৌই।

জোমি নামি নি

জোমি নামি নি -জোমি নামি নি অসি ইং কুমজা ১৯৪৮দগী হৌরদুনা চহী খূদিংগী ফেব্রুৱারিগী ২০দা তোংঙান তোংঙানবা লৈবাকশিংদা পাঙথোকই। নুমিৎ অসিবু অফা অপুন লৈতবা, নুংশিনবা, ইঙনা চীক্না লৈবা, অমত্তা ওইবা, হৌখিবা রাজনিতিগী ওইবা থৌদোক ৱাথোকশিং অমসুং জোমিগী পুৱারীবু নৌহৌনা নিঙশিংবা ওইনা পাঙথোকই।জোমি নামি নি(জোমি নেস্নেল ডে) অসি জোলেণ্ডনা মীতোপকী লৈঙাক্কী মখাদা মীখা পোন্না লৈরম্বদগী লোইশিনখিদুনা নিঙ খা তম্না লৈরকপদু নিঙশিংবা অমসুং ইকাই খুম্নবা উৎপা, ৱাহৈ অমরোমদা হায়রগা মখোয় নিঙ-খা তমলে, মশাগী লৈঙাক লৈজরে তাকপা ওইনা পাঙথোকপা য়াম্না মরু ওইবা নুমিৎ অমনী। হায়রিবা ফেব্রুৱারি ২০ অসি ইং কুমজা ১৯৪৮দগী হৌরদুনা জোমি নামি নি(জোমি নেস্নেল ডে)হায়না চহী খূদিংগী পাঙথোক্তুনা লাক্লি। মসি ভারত অমসুং ম্যানমারদা লৈরিবা জো ফূরুপশিংগী নেস্নেল ইন্টিগ্রেসন ডে(জাতিগী পুনশিনবা নুমিৎ)সু ওই। হায়রিবা নুমিৎ অসি জোমিশিংনা খুন্দাবা মালেমগী মফম পূম্নমক্তা চহী খূদিংগী য়াম্না হরাও তয়াম্না পঙথোক্নরি। নুমিৎ অসি ম্যানমার(বর্মা)দদি নেস্নেল হোলিডে অমা ওইনা শকখঙঙী অমসুং য়াম্না পূক্নীং চিংশিন্নিংঙাই ওইবা অমনা মিজোরামগী ষ্টেটহুড ডেগা নুমিৎ অসিদা পূন্না তামিন্নরি।
মতমগী খোঙচৎ মতুং ইন্না মণিপুর অমসুং মালেমগী তোংঙান তোংঙানবা মফমশিংদা লৈরিবা জোমিশিংনা নুমিৎ অসিবু য়াম্না মরু ওইবা নাৎকী কুম্মৈ অমা ওইনা ত্রাইব পূম্নমক্না মাগী মাগী মশাগী ওইবা নাৎকী চৎনবীগা লোয়ননা তোংঙান তোংঙানবা মখল মখাগী থৌরমশিং হায়বদি মিস জোমি অমসুং ঈশৈ নোংমাইনচিংবা য়াওনা পাঙথোকপা হৌরকখি। অসিগুম্বা য়াম্না মরু ওইরবা চহীগী ওইবা থৌরম অসিনা মীয়াম পূম্নমক্তা য়াম্না কান্নরবা ৱাখল লৌশিং পী। মসিনা পূন্না হিংমিন্নবদা অমগা অমগা ৱাখল তামিন্নদুনা ঈংনা চীক্না লৈমিননবা থৌনাসু পী।

কিহোমগী কুম্মৈ(পাইন এপল ফেষ্টিভেল)

কিহোমগী কুম্মৈ(পাইন এপল ফেষ্টিভেল)- ষ্টেট লেভেল পাইন এপল ফেষ্টিভেল অসি মরু ওইনা চুরাচান্দপুর ডিষ্ট্রিক্টকী খৌশাবুং খুঙ্গংদা গাংতেশিংনা লুচিংদুনা চহী খূদিংগী আগষ্টকী তাং ২৬তা পাঙথোকই। কিহোম থাজরিবা ফূরুপশিংগীদমক্তদি অসিগুম্বা কুম্মৈ অসি মখোয়গী পোত্থোকশিং অসিবু মীয়ামদা পাক শন্না উৎচনবগী য়াম্না খুদোং চাবা অমা ওই।হৌখিবা চহী ৬০গী মমাঙদগী হৌরদুনা খৌশাবুং অমদি মাগী খুল্লোননবদা লৈবা লৌমীশিংনা মখোয়গী মপূং ওইবা শেন্থোক লম্বী ওইনা কিহোম থারকলি। মফম অসিগী লৌমীশিংনা কিউ হায়বা কিহোম মখল অসি য়াম্না মরাং কায়না থাই।

চপচর কুট

কুম্মৈ অসি মখোয়গী খ্বাইদগী ৱাবা থবক উমং কোকথোক শেংদোকপা লোইরবা মতুং মার্চ্চ থাগী মনুংদা পাঙথোকই। মসি য়াম্না হরাও তয়াম্বগা লোয়ননা পাঙথোকপা স্প্রিং ফেষ্টভেলনী। চপচর কুট অসি ১৪৫০-১৭০০এডিদা সুআইপুই কৌবা খুঙ্গং অমদা পাঙথোকপা হৌরকখি হায়না পানরি। হৌজক্তি চপচর কুট অসি চহী খূদিংগী মার্চ্চ থাদা পাঙথোকলে। চপচর কুট অসি মিজোশিংনা পাঙথোকপা চহীগী লৌরোক অমগী তোংঙান তোংঙানবা তাঙ্কক তাকপা কুম্মৈ অহুমগী মনুংদা অমনী। অতোপ্পা অনি অদুনা হৌখিবা সেঞ্চুরিদগী নৌনা পাঙথোকপা হৌরকখ্রবা মিম কুট অমসুং পাৱল কুটনী।

চীন্থাং ৱারী ওইনা চপচর কুট অসি ইহান হান্না সৈপুই খুনদা ম্যানমারগী য়াম্লবা মিজোশিং অমসুং মখোয়গা জাৎ মান্নবা কাঙলূপশিংগা লোয়ননা পাঙথোকখি হায়। চপচর কুট লেপ্তনা পাঙথোকলিবসি মখোয়না উমং কোক্তুনা লৌ উননবগীদমক্তা চহী হৌরকপদা অঙম্বা চীংমায়শিং কোকথোক শেংদোকপদা মখোয়বু অশোক অপন, অশোয় অঙাম য়াওহনখিদবগীদমক্তা তাইবঙ মপুবু তৌবিমল খঙবা উত্তুনা থাগৎপা ফোঙদোকপনী।

জৌ-তোন জৌ-তোন(কম্যুনিটি ফেষ্টিভেল নত্রগা ডিসপ্লে ওফ সকসেস)

মমাঙঙৈগী মতমদা জৌগী মপা মপুশিংনা (মখোয় মশেল)লান শোক্নদুনা য়েক্নবশিংবু ফাদুনা মীনাই ওইহনলম্মী; শাথিবা শাশিংসু তান্দুনা ফারম্মী অমসুং মখোয়গী য়াম্লবা লৌফমশিংদগী মরু মরাং লোকশিনলম্মী। অদুদগী মখোয়না মখোয়গী মায় পাকপা অদু উৎননবগীদমক্তা মখোয়গী মরী মতা, শাগৈ নাতৈ, মপান্দগী মরূপ মপাংশিং অমদি খুনগী মীপূম খূদীংমকপু বার্ত্তন তৌদুনা ‘তোন’ অসি মখোয়গী খুন্দা পাঙথোকই। ‘তোন’ অসি করিগুম্বা মওং খরদা ‘আইহ’গা মান্নৈ।অদুম ওইনমক ‘আইহ’দি মায় পাকপা অমখক্তংগী ওইনা পাঙথোকপা কুম্মৈ অমনী অমরোমদা ‘তোন’দি মায় পাকপা ময়াম পূনশিল্লগা পাঙথোকপা হেন্না চাউবা মশেক মঙাল লৈবা কুম্মৈনী। তাং আইহ, সা আইহনচিংবা পাঙথোকত্রিবা মাগী মপুন্সিদা য়াম্না মশক থোকপা অফবা থবক মায় পাকনা পাঙথোকপা ঙমখিদ্রিবা মীওই অমা (খুনদা লৈবা মী পূম্বা)না তোন পাঙথোকপা য়ারোই মরমদি অসিগুম্বা মীওই অদুদা মসি পাঙথোকপা য়াবগী হক/অয়াবা পীদে।মরম অসিমকননি তোনবু মী অমগী নত্ত্রগা মীওই কাঙলূপ অমগী মায় পাকপদু মীয়ামদা উৎথোকপা য়াম্না মশক থোকপা অমা ওইরিবসি।

সিকপুই রুওই

কুম্মৈ অসি মপুং ওইনা মারশিংনা ডিষ্ট্রক্টতুদা মায় পাক্না ফৌ লোকপা লোইরবা মতুংদা চহী খূদিংগী ডিসেম্বর ১৫দা য়াম্না হরাউ তয়াম্বগা লোয়ননা পাঙথোকই। হায়রিবা কুম্মৈ অসিদা মারগী নহা ওইরিবা নূপামচা অমসুং নূপীমচাশিংনা নাৎকী ওইবা জগোইশিং সিকপুই লম, চাৱন লম, ফৈপিৎ লম, দেন্তে লম, ফাহরেল লমনচিংবা শাই। হায়রিবা নুমিৎ অসিদা খুন কয়ামরুম অমসুং টাউন কয়ামরূমদা অচৌবা চাক্লেন অমসু শীন্নৈ।

খৃষ্ট মাস

খৃষ্ট মাস কুম্মৈ অসি চুরাচান্দপুর অমসুং মালেম শীনবা থুংনা যিশু খৃষ্টগী মপোক নুমিৎপু নিঙশিংদুনা ইকাই খুমনবা উত্তুনা চহী খূদিঙগী ডিসেম্বর ২৫দা লাইনিঙ লাইশোন অমদি নাৎ চৎনবী ওইনা পাঙথোকই। খৃষ্টমাসটাইড অসি এডভেন্ট নত্ত্রগা নেটিভিটি ফাষ্টনা মাঙওইনদুনা খৃষ্টান লিটর্জিকেল ইয়রগী য়াওদ্রবা য়াদ্রবা চাক্লেন অমগা লোয়ননা হৌদোকই।

খৃষ্টমাসটাইডতা ওকটেভ অমা য়াওই। খৃষ্ট মাসকী নুমিৎ অসি মালেমগী ফূরুপ খূদীংমক্কী ওইবা ছুটিনী। কুম্মৈ অসি অয়াম্বা খৃষ্টানশিংনা লাইনিঙ লাইশোনগা লোয়ননা অদুগা খৃষ্টান নত্তবশিংনা চৎনবী ওইনা অমত্তা ওইবগী মওংদা য়াম্না মরু ওইবা ছুটিগী শরূক অমা ওইনা পূন্না পাঙথোকমিন্নৈ।